InfinBank’da rahbariyatning yosh xodimlar bilan uchrashuvi bo‘lib o‘tdi

InfinBank’da rahbariyatning yosh xodimlar bilan uchrashuvi bo‘lib o‘tdi

2026-yil 8-iyul kuni InfinBank’da bank rahbariyatining yosh mutaxassislar bilan uchrashuvi bo‘lib o‘tdi. Tadbir muloqot, fikr almashish va bank sohasida yoshlarning kasbiy rivojlanish istiqbollarini muhokama qilish uchun ochiq maydonga aylandi. InfinBank Boshqaruvi raisi Djurayev Baxtiyor Samadovich ishtirokchilarga tabrik so‘zi bilan murojaat qildi. U bugungi kunda aynan yosh xodimlar innovatsiyalarning harakatlantiruvchi kuchi bo‘lib, ularning bilimi, tashabbuskorligi va rivojlanishga intilishi bankning yanada o‘sishida muhim rol o‘ynashini ta’kidladi.
 

Uchrashuv davomida karyera o‘sishi, kasbiy ta’lim, yoshlarning innovatsion loyihalarda ishtirok etishi, raqamli bank xizmatlarini rivojlantirish, rag‘batlantirish dasturlari, mehnat sharoitlari va korporativ madaniyatni mustahkamlash masalalari muhokama qilindi. Ochiq muloqotga alohida e’tibor qaratildi. Yosh xodimlar o‘zlarini qiziqtirgan savollarni bevosita rahbariyatga berish, taklif va tashabbuslari bilan o‘rtoqlashish, shuningdek, ichki jarayonlarni takomillashtirish va yangi loyihalarni amalga oshirish bo‘yicha g‘oyalarni muhokama qilish imkoniyatiga ega bo‘ldilar.



Tadbir yakunida eng faol ishtirokchilarga bank rivojiga qo‘shgan hissasi va ko‘rsatgan tashabbuslari uchun tashakkurnomalar topshirildi.
Bunday uchrashuvlarning o‘tkazilishi korporativ madaniyatni mustahkamlash, kadrlar salohiyatini rivojlantirish va har bir xodim o‘z kasbiy imkoniyatlarini ro‘yobga chiqarishi hamda bankning yanada rivojlanishiga hissa qo‘shishi mumkin bo‘lgan qulay muhitni yaratishga xizmat qiladi.